Ásbrú nýsköpun

Á Ásbrú er lögð mikil áhersla á nýsköpun. Það má segja að Ásbrú sé skissubók fyrir athafnaskáld. Hér eru til staðar aðstaða og tæki, en skáldin sjá um að skrifa meistarastykkin. 

Í grunninn má segja að það séu þrjár leiðir fyrir frumkvöðla að komast til Ásbrúar.

Sú fyrsta felst í að kaupa eða leigja aðstöðu hjá Þróunarfélagi Keflavíkurflugvallar. Þróunarfélagið á fjölda eigna sem það leitast eftir að koma í hagnýt not í samstarfi við öfluga aðila.

Önnur leið er frumkvöðlasetrið Eldey og fyrirtækjahótelið Eldvörp þar sem Nýsköpunarmiðstöð Íslands veitir frumkvöðlum aðstöðu og stuðning. Eldey er 3.300 fermetrar og skiptist í bæði skrifstofur og smiðjur. Eldvörp er 1.750 fermetra skrifstofubygging.

Þriðja leiðin er í gegnum frumkvöðlanám Keilis. Markmið þess er að mennta og útskrifa nemendur sem nýta sköpunaraflið til framþróunar samfélagsins. Frumkvöðlanámið er í samstarfi við verkfræði- og náttúruvísindasvið Háskóla Íslands og Nýsköpunarmiðstöð Íslands.

Nú þegar hafa fjöldamargir frumkvöðlar sest að á Ásbrú. Fyrsta græna gagnaverið á Íslandi á vegum Verne Global mun brátt rísa á Ásbrú. Atlantic Studios reka hér stærsta kvikmyndaver á Íslandi. Einar Bárðason, athafnaskáld, hefur staðið fyrir glæsilegum skemmtunum í Officeraklúbbnum á svæðinu og svo hefur Jónína Benediktsdóttir hafið rekstur á Detox heilsumeðferðarstöð á svæðinu. Allt eru þetta dæmi um frumkvöðla sem skapa í Ásbrú.